مقام‌های تاجیکستان با ابراز نگرانی از تهدیدهای روزافزون امنیتی از جانب افغانستان، تاکید کردند که موضع این کشور در قبال به‌رسمیت شناختن طالبان به‌عنوان یک حکومت، تغییرناپذیر است. 

خیرالدین عثمان‌زاده، رئیس مرکز تحقیقات راهبردی ریاست‌جمهوری تاجیکستان که روز شنبه در یک نشست خبری در دوشنبه صحبت می‌کرد، تاکید کرد که پس از روی کار آمدن طالبان در افغانستان و افزایش تهدیدها از طرف این کشور، تاجیکستان کنترل مرزها را تقویت کرده و تعداد پاسگاه‌های مرزی را به بیش از ۱۰۰ پاسگاه افزایش داده است.

او بار دیگر به افزایش تهدیدها از سمت رودخانه آمو به تاجیکستان اشاره کرد و تصریح کرد: «تعداد پاسگاه‌های مرزی به ۱۰۰ پاسگاه افزایش یافته و برخی از آن‌ها با همکاری سازمان‌های بین‌المللی ساخته شده‌اند.»

رئیس مرکز تحقیقات راهبردی ریاست‌جمهوری تاجیکستان در این نشست بار دیگر تاکید کرد که موضع این کشور در قبال طالبان تغییری نکرده است و روابط این کشور با افغانستان تنها در سطح اقتصادی پا برجا خواهد بود، چون از دید او روابط اقتصادی بیشتر به مردم افغانستان ربط دارد تا حاکمان فعلی آن کشور. 

عثمان‌زاده افزود: «با توجه به همسایگی که با این کشور داریم، همکاری‌های اقتصادی را متوقف نخواهیم کرد. زیرا حمایت تاجیکستان از مردم افغانستان در درجه اول به تقویت همکاری‌های اقتصادی بستگی دارد.»

به گفته این مقام تاجیکستان، دوشنبه تمام دهلیزهای حمل و نقل خود را در اختیار همه کشورهای همسایه و سازمان‌های بین‌المللی قرار داده است که می‌توانند کمک‌های بشردوستانه به این کشور(افغانستان) ارائه کنند. اما به گفته او، در مورد نگرش سیاسی، موضع تاجیکستان در قبال طالبان تغییرناپذیر است.

رئیس مرکز تحقیقات راهبردی ریاست‌جمهوری تاجیکستان بار دیگر بر ضرورت ایجاد حکومت فراگیر با رعایت حقوق زنان و دختران در کار و تحصیل در افغانستان تاکید کرد و افزود که این خواست تقریبا همه کشورهای جهان از رژیم طالبان است. 

پس از حاکمیت طالبان در افغانستان، تاجیکستان بارها نگرانی‌های شدید خود را از ناامن شدن شمال افغانستان و افزایش تهدیدهای امنیتی از این کشور ابراز کرده است. طی دو سال حاکمیت طالبان در افغانستان، مرزهای تاجیکستان از سمت شمال افغانستان بارها مورد تهدید قرار گرفته است و در یک مورد، یکی از اعضای ارشد ارتش تاجیکستان کشته شد. 

در ماه آوریل امسال، کامران رجب‌زاده، رئیس کمیته‌ امنیت ملی شهر خاروغ تاجیکستان، در یک درگیری با قاچاقچیان مواد مخدر در مرز افغانستان و تاجیکستان کشته شد.

نشریه «ای‌کی‌آی پرس» به نقل از منابع آگاه خود گزارش داد که رئیس کمیته‌ امنیت ملی شهر خاروغ در جریان عملیاتی علیه فروشندگان مواد مخدر در مرز افغانستان کشته شد.

با این حال، دو ماه پیش، امامعلی رحمان، رئیس‌جمهوری تاجیکستان، در نشست آسیای مرکزی و اتحادیه اروپا، که در شهر چولپون آتا قرقیزستان برگزار شده بود، تاکید کرد که قلمرو افغانستان، به‌ویژه استان‌های شمالی و شمال‌ شرقی آن کشور، «محل پرورش تروریسم بین‌المللی شده است».

رئیس‌جمهوری تاجیکستان گفت که افغانستان همچنان یکی از بزرگ‌ترین تولیدکنندگان مواد مخدر در جهان است و اکنون با سلطه طالبان بر این کشور، تولید مواد مخدر چند برابر افزایش یافته است.

امامعلی رحمان ضمن ابراز نگرانی از وضعیت افغانستان، از جامعه جهانی خواست که برای تقویت مرزها با افغانستان کمک‌هایشان را افزایش دهند. رئیس‌جمهوری تاجیکستان تاکید کرد که «ما لازم می‌دانیم که برای تقویت مرز با افغانستان اقدام فوری کنیم».

با افزایش این نگرانی‌ها، تاجیکستان در ماه اخیر تعداد پاسگاه‌های مرزی خود در مرز افغانستان را افزایش داده است. در ماه مه امسال، امامعلی رحمان در افتتاح چندین پاسگاه‌ جدید در مرز با افغانستان حضور یافت و ضمن اشاره به افزایش خطرات و تهدیدها، بر لزوم هوشیاری حرفه‌ای، تیزهوشی سیاسی و خدمت صادقانه سربازان مرزی تاجیکستان تاکید کرد.