نقیب‌الله دهقان‌زاده، سرپرست کنسولگری افغانستان در شهر خاروغ تاجیکستان، از وزارت خارجه طالبان خواست که در ازای «اعلام حمایت علنی و بیعت» با رژیم این گروه، برای پرداخت اجاره‌خانه و همچنین اجاره ساختمان کنسولگری افغانستان در خاروغ برای او از طریق «حواله» پول بفرستند.

دهقان‌زاده این درخواست خود را پس از آن به میان آورد که در پیامی ویدیویی اعلام کرد به‌عنوان سرپرست کنسولگری افغانستان در خاروغ، از رژیم طالبان دستور می‌گیرد و برای ادامه کار کنسولگری در شهر خاروغ حضور دارد.

دهقان‌زاده در نامه‌ای که به وزارت خارجه طالبان ارسال کرد، نوشت: «از اینکه قبلا معاشات [حقوق] و اجاره‌خانه‌ام را خودم از طریق ایران انتقال می‌دادم، با تغییر شرایط و وضعیت پیش‌آمده، به ایران رفته نمی‌توانم. امیدوارم اجاره خانه و حقوق ما از طریق حواله ارسال گردد.»

دهقان‌زاده همچنین در این نامه نوشته است که پس از آنکه ظاهر اغبر، سفیر افغانستان در تاجیکستان، از همکاری او با طالبان اطلاع پیدا کرد، در نامه‌ای به وزارت خارجه تاجیکستان اطلاع داد که فعالیت کنسولگری افغانستان در شهر خاروغ به حال تعلیق درآمده است. برخلاف این اطلاع سفیر افغانستان، نقیب‌الله دهقان‌زاده با حمایت رژیم طالبان به فعالیت خود به‌عنوان سرپرست کنسولگری افغانستان در خاروغ ادامه داده است.

نامه سرپرست کنسولگری افغانستان در شهر خاروغ تاجیکستان به وزارت خارجه طالبان-X@nozjon

 

دهقان‌زاده همچنین در نامه‌اش از طالبان خواسته است که برای او پول بیشتری «‌برای انجام وظایف سپرده‌شده در پروژه جدید» بفرستند. او تاکید کرده است که در شرایط پیش‌آمده در تاجیکستان، او «به پول عملیاتی» بیشتری نیاز دارد تا از طریق نهادهای امنیتی تاجیکستان، امنیت خود و خانواده‌اش را تامین کند.

تاجیکستان در میان کشورهای همسایه افغانستان، تنها کشوری است که هنوز ارتباط رسمی و علنی دیپلماتیک با طالبان برقرار نکرده است. امامعلی رحمان، رئیس‌جمهوری تاجیکستان، بارها تاکید کرده است تا زمان شکل‌گیری دولت فراگیر در افغانستان، تاجیکستان رژیم حاکم در کابل را به رسمیت نمی‌شناسد.

با این حال، طالبان در دوسال گذشته همواره سعی کرده‌اند سفارت افغانستان در شهر دوشنبه را تصرف کنند. وزارت خارجه رژیم طالبان تا‌کنون دوبار افرادی را به‌عنوان سرپرست امور سفارت افغانستان در تاجیکستان معرفی کرده‌ و دستور داده‌اند که کار ظاهر اغبر به‌عنوان سفیر افغانستان پایان یابد.

ظاهر اغبر که عضو جبهه مقاومت ملی افغانستان به رهبری احمد مسعود است، سه‌شنبه هفته گذشته، نامه وزارت خارجه رژیم طالبان را مقابل دوربین رسانه‌ها پاره کرد و گفت تا زمانی که در افغانستان یک حکومت مشروع و قانونی شکل نگیرد، از رژیم طالبان دستور نمی‌گیرد و به کار خود به‌عنوان «‌سفیر و نماینده رسمی مردم افغانستان در تاجیکستان» ادامه می‌دهد.

اما مشخص نیست که کنسولگری افغانستان در تاجیکستان در هماهنگی با وزارت خارجه تاجیکستان فعالیت می‌کند، یا تنها به ابزار سیاسی و تبلیغاتی طالبان تبدیل شده است.

حافظ ضیا احمد، معاون سخنگوی وزارت خارجه طالبان، روز پنجشنبه، ۹ نوامبر، با انتشار ویدیوی نجیب‌الله دهقان‌زاده در شبکه ایکس نوشت که سرپرست و کارمندان کنسولگری افغانستان در خاروغ، از اوامر رژیم طالبان اطاعت می‌کنند.

طالبان در دوسال گذشته توانستند سفارت‌های افغانستان را در بیشتر کشورهای آسیایی تصرف کنند، اما هیچ‌یک از دیپلمات‌های افغان مقیم کشورهای غربی، به‌جز سرپرست سفارت افغانستان در اسپانیا، حمایت خود را از طالبان اعلام نکرده‌اند.